بدي ابلش مشروع على الانترنيت


وصلني ايميل من شخص عزيز بطلب مني اعطي نصائح واساعده بانه بدو يفتح مشروع لموقع على الانترنت فحبيت تعم الفائدة والكل يستفيد:

إعلان - Advertisement

اول شي انا بشد من همت اي حدا ناوي بفتحلو موقع على الانترنت وبقلك انو الشي هاذا كثير رائع والو مستقبل كثير ممتاز… ولكن… لازم تعرف ان هذا الشي مش سهل… يعني بدو تعب ومتابعة كبيرة هذا بالاضافة لانو بحتاج تسويق من النوع الاول والها تفاصيل كثير بعضو مجاني وبعضو بحتاج دفع… انتا بتقدر تبدا شوي شوي…

اللي لازم تعملو هو كالاتي:

بدي ابلش مشروع على الانترنيت

بدي ابلش مشروع على الانترنيت

1- اكتب افكارك والشي اللي حابه بالمشروع على ورق بالتفاصيل المملة (يعني خربش قد ما بتقدر) مهما كانت التفصيل صغيرة وارسم كمان اي شي الو علاقة بالموضوع، اكتب بالعربي بالعنجليزي الشي اللي بريحك (مش فارقة) بداية يعني حط كل اللي براسك على ورق، ولا تفرجي لحدا (بفضل بهاي المرحلة انك ما تجيب سيرة لحد حتى لو اصدقائك المقربين) الا للي بتشوفو امين على سرك 100% ورح يكون معك بالمشروع.

2- هلق كل اللي كتبته بترتبه على الكمبيوتر (يعني برنامج وورد او ما شابهه) ما تنسا تبحث على الانترنت على اي مقالات الها علاقة بالموضوع ومفيدة الو ودخلها بالموضوع مع ذكر المصدر لانو مهم، اذا كان بتقدر تعمل رسوم بيانية او تحليلات جوهرية بكون الوضع ممتاز، طبعا الترتيب يعني بدك تحط رؤوس اقلام للموضوع وتحتها تشرح وحاول تكون كتابتك منمقة وذات معاني واضحة… وما تكتر بالحكي على اشي فاضي (يعني ما قل ودل) بس مش مختصر لانك بتشرح عن المشروع، ابدا بشرح مختصر عن المشروع بشكل عام بما لا يقل عن نص صفحة ولا يزيد عن صفحة، وبعدين حط نقاط وشرح لكل نقطة وفهرس ومما يلزم بس شو يعني مش رايح تحارب انت الشي اللي بتقدر عليه، يعني بشكل انو يطلع عندك ملف كاف وشامل ومرتب لتفاصيل المشروع.

3- ما تنسى تدور على مواقع عربية بشكل خاص او عالمية واجنبية بشكل عام عاملة متل مشروعك او قريبة منو، واذكرفي نفس الملف كل موقع وشو الاشياء اللي بتميزه واللي حبيتها في… وتفرج طريقة عملهم، يعني بالمختصر اعمل ورقة عمل لكل موقع وما تقصر بهذا الموضوع لانو مهم ورح يثري مشروعك، طبعا ضروري تعرف انو لو في مليار موقع بعمل نفس الشي هذا لا يعني ابدا انو شغلك رح يخرب وما رح يزبط ابد، بالعكس انتا لازم تستفيد من كل شي عملو وتطلع اشي جديد همو ما عملو او مش مهتمين في، طبعا لو اتطلب الامر انك تحكي معهم على اساس انك عميل مفترض او بدك تستفيد من خدماتهم عشان يعطوك معلومات وتشوف طريقة عملهم هاذا الشي بكون كتير ممتاز. طبعا بالنهاية حط كل المعلومات اللي جمعتها ولفو بهالمشروع.

4- هيك بكون طلع عندك ملف مرتب، في الفكرة وتطبيقها وتفاصيلها والمنافسين، طبعا اذا فيك تحط الامور المالية والدفع وما الا ذلك بكون الامور ممتازة، ما تعقد الامور بلاش تحبط، خلي الامور تمشي ببساطتها، وحط لحالك وقت لتخلص هالشغل واللي المفروض يوخد ما بين اسبوعين لشهر بس، ما تتكاسل ولا تحبط، هو هاد عدوك الاول

5- هذا اللي عملته بنسمية دراسة المشروع، طبعا هذا اشي بسيط بس رح يفيدك كتير… رح اضيف ملف جاهز لل تخطيط لمشروع بس بالانجليزي خد منو اذا بتشوفو مناسب… بس ما تعجق حالك ولا ترغم حالك تكتب بالانجليزي لانك رح تضيع وقتك اترجم و هالخرابيط اللي على اشي فاضي.

*ملاحظة اذا كنت معتمد انك تاخد دعم من ممول او من دعم المشاريع الصغيرة “انسى”… قصدي بدك تحول دراسة المشروع للغة العنجليزية وتمشي على ترتيب معين برظو موجود بالملف المرفق.

6- بعد كل هاد اجا دور برمجة المشروع… الحين بدك تحدد مين بدو يبرمج المشروع وباي لغة بدك يبلش وقصص البرمجة، يعني في كتير لغات، انا مني وعلي بفضل انك تختار اما PHP او .NET لانهم منتشرين ومعروفين كتير وما رح تتغلب تلاقي ناس يشتغلو عليهم.

7- شغلة كتييييييييييييييييييييييييييييييييييييييييييير مهمة تصميم الموقع، بقلك اياها من هلق، تصميم الموقع اهم شي بمشروعك على الاطلاق، يعني فكرة وبرمجة وتطبيق وتسويق وتخطيط مشروعك كوم وتصميمه كوم ثاني، بالعربي اذا ما كان تصميمك رقم واحد واشي ينحكى فيه… انسى كل مشروعك (طبعا التصميم الحلو لا يعني باي شكل من الاشكال عجقة الالوان والفلاش والحركة والخرابيط المخربطة والتي ان دلت فانما تدل على بطيخية عقل المصمم من الاخر) التصميم يجب ان يكون جذابا بسيطا مريحا ومنسقا بين الوانه وسريع التصفح، غير هيك انسى الموضوع كله، هاي من خبرة ومن الاخر يا سيدي.

8- بعد ما يجهز التصميم وتكون زي ما حكينا، بتبلش بالبرمجة، ما تنسى تحجزلك اسم مرتب يكون عنوان موقعك قبل تبدا اشيي، بلاش يروح عليك الاسم وتقعد تولول وتقول “اجت الحزينة تفرح ما لقتلهاش مطرح” واللذي منو، تاكد من انو البرمجة تكون مبنية على قواعد برمجية معروفة عالميا او مجهزة لاي تغير او تحديث او تطوير مستقبلي متوقع، تاكد من انو تحليل المشروع هو 75% من نجاحة وبرمجتة هي عبارة عن ادخال بيانات مش اكثر ومتخليش اي حد يتفصحن عليك ويعملك فيها ابو العريف، كلها كودين و كود وكلها صارت جاهزة على الانترنت.

9- بهاي الاثناء انتا بتكون قاعد بتجهز بحملة تسويقية مجانية، مجانية لاني عاف انو احنا مشحَرين ويا دوب معنا نوكل من الاخر, الفكرة بلاش مصاريف زيادة من اولها… بتبلش بالمنتديات والمدونات والتشات واللي بتعرفهم واللي ما بتعرفهم كون قاعدة علاقات كبيرة وما تخلي حدا من شرك (قصدي من خيرك)، واللي بتعرفو احسن من اللي ما بتعرفوش… هناك قاعدة لازم تحطها حلقة بذنيك الثنتين “لا تركض وراء النقود بل ابني زبائن” وبالانجيزي “Don’t chase money build clients ” من غير العلاقات رح تدفع تسويق على اشي فاض خصوصا بعالمنا العربي.

10- ما تنسى تحط محلل احصائي لموقعك، عشان تعرف الداخل والطالع وين اكثر شي العالم بتدخل وعشو بتكبس، ما تسى انك مش فاتح قهوة، في برامج كثير ممتازة لهالشي انا بستخدم قوقل انالتكس (google.com/analytics) كتير بفيدك.

11- لازم تعرف انك رح تكون: مدير، مسوق، مبرمج، محلل، محاسب، موظف علاقات عامة، مسيح جوخ، حلاق، شفير، فراش، خرَيط، وسعدان كمان… والمشكلة اني ما بمزح انت فعلا رح تكون كل هذول، لانك لازم تعرف كل شي خصوصا اولها، وما تنسى انك رح تسب على حالك وعفوا على هالكلمة بس رح (تبزق) على اليوم اللي فكرت انك تفتح فيه شغل وتصير تلطوش بحالك كفوف وتركظ بالشارع زي المسطول او الاهبل والولاد الصغار يركظو وراك… اذا وصلت هاي المرحلة بكون كتير ممتاز وبقدر اقلك انك بطريقك للنجاح وانك قربت كثير تعدي مرحلة الخطر وتطلع لمكان ثاني بعدين بقلك شو هو… المهم ركز وشد حيلك وما بدي اقلك ما تخلي شي يحبطك لانو كل شي رح يحبطك وبرظو من الاخر بقلك اياها انتا يا سيدي مش عايش بامريكا ولا لا؟، بس انا عندي العلاج…

لما تحس حالك محبط او معكاش مصاري واللذي منو اعمل شغلتين:
1- توضا وصليلك ركعتين وادعي واحكي مع الوالدة والجيران والقرايب وام علي وام ريالة والزبال والشحادة والكل يدعولك.
2- اعمل اشي بريحك او روح على المكان  اللي بسموه مكانك السعيد، يعني في لكل بني ادم مكان بس يروح عليه برتاح… روح على هظاك المكان وخودلك بريك بسيط وانسى فيه كل اشي على الاطلاق واهم شي كون لحالك مش ناقصك قلعطة ولا قرقعة… بالنسبة الي انا بحب اروح السينما :).

واي شي يا سيدي انا جاهز ابعثلي وانا مستعد اسعدنك قصدي اساعدك ومن الاخر.
غيرو؟؟؟

مهدي البوريني

تصنيفات: أوراقي الكاتب: قراءات: عدد المشاهدات (736) فى: 19 أكتوبر 2008

ناشط فعال في حركة زيادة المحتوى العربي

  • Abu Wadea3

    مشكور يا مان على الإطاله 😉

  • http://feedoor.com Mamod Mehyar

    مشكور أخو مهدي على هالموضوع الحلو, عنجد كفيت ووفيت و بطريقة خفيفة دم.. فعلا أنو انشاء و ادارة المواقع وجع راس بس في النهاية هالشغلة كتير ممتعه و بنصح كل واحد بحب البرمجة و الويب و عنده فكرة موقع مرتب انو يخوض فيها ولا يستنى.. و أسأل الله التوفيق لكل المبرمجين والمصممين العرب.